النتائج 1 إلى 2 من 2

الموضوع: قطي عنده اسهال وغازات... أرجو المساعده يا دكتور هاني

  1. #1
    شخصي
    تاريخ التسجيل
    May 2018
    الدولة
    السعودية
    العمر
    31
    المشاركات
    1
    التقييم
    0
    قوة التقييم
    0

    Question قطي عنده اسهال وغازات... أرجو المساعده يا دكتور هاني

    قطي " شاركي " عمره حوالي سنه ونصف , وزنه 5.5 كيلوجرام تقريبا , ذكر , سلالته ( بلدي ) , تم تطعيمه جميع التطعيمات و اخد علاج الديدان .
    بالنسبه لنظامه الغذائي فهو متربي على الرويال كانين دراي فوود لكن و هو كيتن كان بيسببله اسهال فكنت بنقع الدراي فوود في الماء عشان الزيوت تطلع و بعدين اقدمه للقط , اي اكل تاني كان بيسببله اسهال حتى الدجاج المسلوق بس لما كبر بأه ياكل الدراي فوود والدجاج المسلوق بدون مشاكل .
    من حوالي شهر ونصف أكل معايا هوت دوج بس أخوه مأكلش معانا و من وقتها بدأ يعاني من اسهال شديد بس من قبلها كان كل فتره ممكن يرجع مره ماء اصفر بدون كرة شعر أو مع كرة شعر , بعد اصابته بالاسهال أخدته على البيطري وعملتله تحليل براز وكان النتيجه ان عنده طفيلي الكوكسيديا لكن مفيش ارتفاع في درجة الحرارة فالدكتوره طلبت ان اغير نوع الأكل و جبتله داري فوود للجهاز الهضمي الحساس واديتله دواء ديدان ووصفتلي علاج أسمه فلازول من الصيدليه البشريه و هو مضاد حيوي للبكتريا وقالتلي أمشي عليه لمدة اسبوع 2 سم مرتين في اليوم واذا الحاله استمرت اكمل عشرين يوم كمان وللأسف سمعت الكلام بس انا حاسس ان ده كان غلط عشان أول مره اسمع عن مضاد حيوي لمدة 25 يوم... الاسهال فعلا كان وقف أثناء العلاج أول اسبوع ولما وقفت العلاج رجع تاني ونفس الكلام بعد العشرين يوم رجع تاني فأنا قلت ان ده بسبب الدراي فوود و اديته كابتين لمدة اربع ايام تقريبا مجابش نتيجه فوقفته و بعدين اديته ايموديوم من الصيدليه البشريه وهو دواء لتثبيط حركة الأمعاء بس اديته منه مرتين بس لأني لاحظت ان جاله شوية انتفاخ وغازات و رجع أكله كامل مرتين فوقفت الدواء فورا واديته probiotic الصيدلي وصفهولي انه امن جدا اسمه انتروجرمينا والمفروض انه بيعالج اثار المضادات الحيويه عشان اذا كان الفلازول تسبب بضرر المفروض ان انتروجرمينا يعالج ده.
    القط من ساعة ما بدأت المشكله من حوالي شهر ونصف مفيش اي حاجه اتغيرت من طباعه , هو خمول نوعا ما رغم ان اخوه ما شاء الله نشيط... حاليا " شاركي " معندوش نفس الاسهال اللي كان عنده من البدايه ممكن اللي وقفه هو الايموديوم بس لما بيعمل براز بيكون نصفه متماسك و نصفه شبه سائل و اللون بني غامق محروق والرائحه كريهه جدا وبيكون التبرز مصحوب بغازات و التبرز بدون معاناه على ما اعتقد , وأعتقد انه عنده انتفاخ نوعا ما و بيصدر منه غازات لها رائحه وهو نايم او صاحي ولكن بدون صوت و ايضا لم اسمع اصوات داخل بطنه ولكن يبدو ان في حاجه مدايقاه لأنه بيلحس جانبي بطنه من اسفل بشكل متكرر... وأحيانا بيكون فيه شحوب في لون أنفه و لون لسانه وفمه من الداخل احيانا بيكون مائل للزرقه بس الحاجات ديه موجوده من الأول .
    انا قرأت كتير من ردودك على موضوعات ناس تانيين يا دكتور و حاولت استفاد قدر الامكان فوقفت الدراي فوود بقالي اكتر من اسبوع وبأكلهم دجاج مسلوق و لحم مسلوق بس من تلات مرات لخمس مرات في اليوم حسب شهيتهم وطلبت ادوية انتينال و ستربتوكين من مصر شوفت حضرتك بتوصفهم لأكتر من واحد وبإذن الله ممكن يوصلوا خلال 10 ايام .
    انا عارف ان الموضوع طويل جدا بس أنا حاولت أوفي كل النقط اللي حضرتك ذكرتها في موضوعك المثبت و عشان حضرتك يكون عندك كل المعلومات اللي ممكن تفيد لأني بجد أتمنى مساعدة حضرتك .

  2. #2
    مشرف عام الصورة الرمزية د. هاني اسماعيل
    تاريخ التسجيل
    Jul 2009
    الدولة
    Cairo, Egypt
    العمر
    44
    المشاركات
    5,014
    التقييم
    22
    قوة التقييم
    20

    افتراضي

    بعض القطط بيكون عندها مشاكل مع الاكل الجاف بصفه عامه او مع زياده الكميه لذا يجب تقنين الكميه المقدمه للقطط خلال اليوم فالقط البالغ لا يحتاج اكثر من 80 -100 جرام يوميا من الاكل الجاف الجيد .
    جيد انك اوقفت الاكل الجاف لبعض الوقت يفضل لاسبوعين ان امكن مع ملاحظه الاخراج .مع ضروره تجنب الحليب و الاسماك و الخضروات و النشويات .
    و مهم جدا اعطاء ادويه ديدان للقطين في نفس الوقت و التكرار بعد اسبوعين .
    و بعدها ننتظر النتيجه و لا مانع من اعطاء ستربتوكين في حاله توافره بمعدل 3 مرات يوميا او يومين ثم مرتين يوميا بجرعه مقدارها 1 سم
    د. هاني اسماعيل
    القاهره - مصر

الكلمات الدلالية لهذا الموضوع

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •