هو واحد من الامراض الفيروسية المسببة للسرطانات في الدواجن وممكن كمان يصيب الرومي ويسببه فيروس من عائلة الهربس herpes virus يعرف ايضا بمرض شلل الطيور fowl paralysis او مرض عين السمكة fish eye disease ويعتبر مرض وبائي شديد العدوي حيث يسبب نسبة نفوق عالية جدا قد تصل الي 80% خاصة عند الاصابة بالصورة الحادة من المرض زي ما هنعرف كمان شوية اما نسبة الاصابة في القطيع تكون 100% ولكن في بعض السلالات المقاومة للفيروس تكون الاصابة بين 10 الي 30% وعندما تكون الامهات محصنة ضد المرض تنقل هذه المناعة وتسمي بالمناعة الامية الي الكتاكيت الفاقسة ولكن هذه المناعة تستمر فقط 21 يوم وبعدين تختفي فيكون الكتكوت عرضة للاصابة بالمرض وممكن تصاب الكتاكيت من عمر يوم لو كانت المنطقة اللي المزرعة موجودة فيها موبؤة او فيه مزارع جنبها مربية فراخ كبيرة حاملة للفيروس




وهنعرف ازاي الاصابة بتحصل الاول عن طريق الاصابة الرأسية يعني الام المصابة بتنقل الفيروس الي البيض يعني للكتكوت او ممكن تحصل عدوي افقية في المزرعة بطريقة مباشرة نتيجة ملامسة الطيور المصابة والسليمة واختلاطهم ببعض او بطريقة غير مباشرة نتيجة استنشاق الفراخ للهواء والاتربة الملوثة بالفيروس او وجود حشرات في العنبر او لمل تدخل دورة جديدة والدورة اللي قبلها كانت مصابة ومطهرتش كويس كمان الفيروس بيبقي موجود في جذور او منبت الريش للفراخ المصابة ولما يقع الريش في الارض يبقي مصدر دائم للعدوي لان الفيروس بيفضل عايش في العنبر والسبلة والادوات لمدة 3 – 6 شهور وخاصة اذا نقلت السبلة الي مناطقة اخري زراعية قريبة من مزارع دواجن فتصيبها وتكون الاصابة الافقية اخطر واسرع من الرأسية بسبب انتقال الفيروس من الريش المتساقط ويتكاثر الفيروس ببطء عشان كدة مبتظهرش اعراض مرضية الا بعد 6 اسابيع من دخول الفيروس داخل جسم الطائر.




وهذه الاعراض تختلف حسب نوع المرض لان المرض ليه صورة مزمنة تكون فترة الحضانة فيها 8 الي 12 اسبوع ويوجد منها نوعان نوع عصبي يصيب اعصاب الرجل وخاصة العصب الوركي sciatic nerve فبيخلي الفرخة تمسي رجل ورة ورجل قدام زي راقصة الباليه زي ماقولنا في موضوع تشخيص الدواجن قبل كدة زي ماتابعنا علي بورصة الدواجن وكمان اعصاب الجناح والرقبة والحوصلة فيسبب الشلل اما النوع العيني يصيب اعصاب العين ويسبب تشوه في القزحية ويعمل نقط او غشاء ابيض رمادي عليها وتضيق العين تدريجيا عشان كدة بسميه مرض عين السمكة فيسبب العمي للفراخ وعدم قدرتها علي الوصول للماء والعلف فتموت , ثانيا الصورة الحادة او الدرنية وتكون سريعة الانتشار بعد ظهورها وممكن يوصل النافق الي 80% والمرض اي كان النوع بتاعه بيعمل شوية اعراض عامة زي اختلال في الحركة وعدم الاتزان والفرخ يمشي رجل وره ورجل قدام ونايم علي بطنه او الوقوف علي احد الارجل والتواء الاصابع ثم المشي علي الاصابع الملتوية وتتقوس مفاصل الركبة ويحدث ضمور في العضلات وضعف وهزال شديد وتدلي الجناحين والتواء الرقبة وصرخات عالية وشلل بالحوصلة وتعفن العلف بها وتحدث اسهالات مائية مائلة للاصفرار تكون متعفنة وكريهة الرائحة ويحدث العمي نتيجة تشوه القزحية وغالبا مايحدث بعد عمر 8 شهور وفي الدجاج البياض يحدث انخفاض شديد في انتاج البيض .




نيجي بقي ازاي اشخص المرض لما اشرح الفراخ الميتة والفراخ عمرها صغير هلاقي درنات صغيرة علي الكبد والطحال وهلاقي تضخم في الكبد والطحال وبيبقوا ناشفين او قاسي في الملمس وعليهم خطوط صفراء وايضا تضخم في الرئتين وبتبقي قاسية الاطراف اما لو الفراخ اعمارها كبيرة هلاقي تضخم في الاعضاء الداخلية وهلاقي درنات كبيرة عليها وخاصة المبيض وكمان درنات صغيرة علي الجلد علشان كدة المرض ده بيشبه مرض الليكوزس اللي هو سرطان الدواجن ولكن مرض الليكوزس مبيظهرش فيه درنات علي المبيض .




طبعا المرض ده فيروسي فمفيش علاج مخصص ليه ولكن بعمل وقاية وتحصين ضد الفيروس والوقاية بتكون بالتطهير الجيد للعنبر والحفاظ علي درجات الحرارة المنتظمة والتهوية الجيدة وعدم تربية أعمار مختلفة في مزارع متجاورة والحرص علي تقديم العلائق المتوازنة للحفاظ علي المناعة وعلاج الامراض الثانوية اول بأول لان امراض زي السالمونيلا والكوكسيديا و الجمبورو والطفيليات بتهيئ الفراخ للاصابة بالمرض اما التحصين فهناك نوعان الاول اللقاح الفردي زي رسبنس cui او رسبنس hut او اللقاح المزدوج (ماريك + رسبنس) وهو متداول في السوق ويتم التحصين في معمل التفريخ بعد فقس الكتاكيت .


المصدر : بورصة الدواجن اليوم في مصر
http://www.poultrystocks.com/2016/07...s-disease.html